ЭРХЭМ ЗОРИЛГО

Хөдөөгийн үйлдвэрлэл, үйлчилгээ эрхлэгчдийн харилцан итгэлцэл, хамтран ажиллах сонирхолыг дэмжиж, хоршоолол хөгжих таатай орчинг бүрдүүлэхэд оршино.



Зүүн Азийн Хөдөө Аж Ахуйн Байгууллагуудын Зөвлөлийн 24 дэх удаагийн дээд хэмжээний уулзалт

Зүүн Азийн хөдөө аж ахуйн байгууллагуудын зөвлөлийн 24 дэх удаагийн Дээд хэмжээний уулзалтыг БНСУ-ын ХАА-н хоршоологчдын холбоо /NACF/ 2014 оны 11 сарын 10-13-ны өдрүүдэд БНСУ-ын Сөүл хотноо амжилттай зохион байгууллаа. 

Энэ удаагийн дээд хэмжээний уулзалтанд Монголын хөдөө аж ахуйн хоршоологчдын үндэсний холбооны ерөнхийлөгч, УИХ-ын гишүүн Д.Сумъяабазар, дэд ерөнхийлөгч Ц.Алтантуяа, мэргэжилтэн М.Гийхнаран, үндэсний холбооны ерөнхийлөгчийн зөвлөх Цогтбаяр оролцон, НҮБ-аас 2014 оныг “Өрхийн аж ахуйн олон улсын жил” болгон зарласантай холбогдуулан хийсэн ажил түүний үр дүнг тайлагнан, тулгарч буй асуудлууд, тэдгээрийг шийдвэрлэхэд хоршоологчдын үүрэг, оролцоо ямар байх талаар хэлэлцэв. Уулзалтын төгсгөлд оролцогч орнууд “Хоршоогоор дамжуулан өрхийн аж ахуйг дэмжьe” сэдэвт хамтарсан тунхаг бичиг гаргалаа. Энэхүү тунхаг бичигтээ Зүүн Азийн хөдөө аж ахуйн байгууллагуудын зөвлөлийн гишүүд тогтвортой хөдөө аж ахуй болон хүнсний аюлгүй байдалд өрхийн аж ахуй эрхлэгчдийн гүйцэтгэж буй үүргийг онцлон тэмдэглээд бүтээгдэхүүний үнийг шударгаар тогтоох, цаг уурын өөрчлөлтийг сааруулах, хүйсийн тэгш байдал болон жижиг хэмжээний аж ахуй эрхлэгчдэд зориулсан бодлогод нөлөөлөх зэргээр хөдөө аж ахуйн хоршоогоор дамжуулан өрхийн аж ахуйг чадавхижуулах нь зүйтэй юм гэж дурьдсан байна.

Энэхүү дээд хэмжээний уулзалтын үeэр Үндэсний холбооны ерөнхийлөгч Д.Сумъяабазар Японы ХАА-н хоршоологчдын холбооны тэргүүн Акира Банзай, Тайваний ХАА-н хоршоологчдын холбооны хяналтын зөвлөлийн дарга Тиен Чи Пай, БНСУ-ын Хадгаламж зээлийн хоршоодын холбооны ерөнхийлөгч Мүн Чол Сан нартай ажил хэргийн уулзалтуудыг хийж, харилцан ашигтай хамтын ажиллагааг гүнзгийрүүлэн хөгжүүлэх талаар ярилцаж санал бодлоо солилцов.