ЭРХЭМ ЗОРИЛГО

Хөдөөгийн үйлдвэрлэл, үйлчилгээ эрхлэгчдийн харилцан итгэлцэл, хамтран ажиллах сонирхолыг дэмжиж, хоршоолол хөгжих таатай орчинг бүрдүүлэхэд оршино.



“Орон нутгийн хөгжилд хоршооллын гүйцэтгэх үүрэг” сэдэвт Говь-Алтай аймгийн хоршоологчдын чуулган боллоо.

 

          Каритас монгол ТББ, МХААХҮХолбоотой хамтран хэрэгжүүлж буй “ХАА-н нэвтрүүлэх үйлчилгээг сайжруулах, хоршоодыг дэмжих” төслөөс санаачилан аймгийн ЗДТГ, ХХААГазар, Хөдөлмөрийн  хэлтэс, МХААХҮХолбоо, аймгийн ХААХХолбоо хамтран “Орон нутгийн хөгжилд хоршооллын гүйцэтгэх үүрэг” сэдэвт хоршоологчдын чуулганыг  2015 оны 12-р сарын 24-нд Алтай хотод амжилттай зохион байгууллаа.

          Чуулганд  аймгийн хөдөө аж ахуйн хоршооны удирдлага, гишүүд, малчид, тариаланчид, төр захиргааны байгууллагын холбогдох албан тушаалтан нийт 100 гаруй хүн оролцов.

           Чуулганы үйл ажиллагаанд Говь-Алтай аймгийн засаг дарга О.Амгаланбаатар оролцож орон нутгийн хэмжээнд хөдөө аж ахуйн хоршооллын салбарын хөгжлийн талаар баримталж буй бодлого, хэрэгжүүлэх үйл ажиллагааны тухай танилцуулж мэдээлэл хийж, чуулганы явцад амжилт хүсэв. Мөн Аймгийн засаг даргын орлогч Д. Чинзориг “Орон нутгийн хөгжилд хоршооллын гүйцэтгэх үүрэг”, МХААХҮХ-ны гүйцэтгэх захирал Л.Тэмүүжин “ХАА-н хоршооллын өнөөгийн байдал цаашдын зорилт”, Хөдөлмөрийн  хэлтсийн дарга М.Мянганбуу “ЖДҮ эрхлэх болон ажлын байр нэмэгдүүлэхэд хоршоодын оролцоо”, аймгийн ХААХХолбооны гүйцэтгэх захирал Б.Наваанюндэн Аймгийн ХАА-н хоршоологчдын холбооны үйл ажиллагаа, төслийн орон нутгийн зохицуулагч Ч.Дашдэлэг “Хоршоодыг дэмжих төслийн үйл ажиллагаа” сэдвээр тус тус илтгэл мэдээлэл хийж, оролцогчдын сонирхосон асуултуудад дэлгэрэнгүй хариулт өгч байв.

          Чуулганы хөтөлбөрийн дагуу “Төр хоршооллын хамтын ажиллагаа”, “Хоршооны хөгжилд гишүүдийн оролцоо”, “Хоршооны удирдлагын идэвхитэй үйл ажиллагаа” гэсэн үндсэн 3 чиглэлээр салбар хуралдаануудыг зохион байгуулж, оролцогчдоос гарсан саналуудыг нэгтгэн аймгийн төр захиргааны байгууллага, хоршоо дэмжигч ТББ болон төсөл хөтөлбөрийн байгууллага, хоршоодын гишүүд, удирдлагад хандсан зөвлөмж гарган тус баримт бичгийн биелэлтийг дараагийн чуулганд тайлагнахаар шийдвэрлэсэн нь онцлогтой байв.