ЭРХЭМ ЗОРИЛГО

Хөдөөгийн үйлдвэрлэл, үйлчилгээ эрхлэгчдийн харилцан итгэлцэл, хамтран ажиллах сонирхолыг дэмжиж, хоршоолол хөгжих таатай орчинг бүрдүүлэхэд оршино.



“Хоршооны санхүүгийн үйлчилгээ ба хөдөөгийн хөгжил” сэдэвт семинарт оролцлоо.

Олон улсын хоршооллын холбоо, Бүх Хятадын Ханган нийлүүлэлт борлуулалтын хоршоодын холбоо /БХХНБХХ/ хамтран жил бүр зохион байгуулдаг сургалтыг энэ жил БНХАУ-ын Юннан мужийн Дали хотноо 2016 оны 7-р сарын 26-31-ний өдрүүдэд “Хоршооны санхүүгийн үйлчилгээ ба хөдөөгийн хөгжил” сэдвээр зохион байгууллаа.

Уг сургалт семинарт Энэтхэг, Индонез, Малайз, Малдив, Монгол, Мьянмар, Непал, Филиппин, Шри-Ланка, Вьетнам, БНХАУ зэрэг 11 орны 30 гаруй төлөөлөгч оролцсон ба Монгол улсаа төлөөлж Үндэсний холбооны хоршоо хариуцсан мэргэжилтэн Д.Индра, МХСМТ-ийн мэргэжилтэн М.Золжаргал нар амжилттай оролцоод ирлээ.

Сургалт семинарыг Хусейн Полат /Турк/, Робби Тулус /Канад/, Балу Иер /БНЭУ/, Тиэрри Вишаупт /Франц/, Ли Воок /БНСУ/, Шен Зетао /БНХАУ/ зэрэг хоршооллын салбарт олон жил ажилласан туршлагатай доктор, профессор нар удирдан явуулж хөдөөгийн хөгжилд хоршооллын санхүүгийн үйлчилгээг хэрхэн үзүүлдэг талаар танилцуулж амжилттай болон алдаатай туршлагуудын талаар мэдээлэл хийлээ.

Сургалтын явцад оролцогч бүх орнууд өөрийн орны ХАА-н салбарын хөгжил, онцлог, хоршооллын хөдөлгөөний хөгжил, хоршооллын салбарын санхүүжилт, энэ чиглэлээр тухайн орнуудын Засгийн газруудын баримталж буй бодлого, шийдвэр зэргийг харуулсан товч танилцуулга хийж харилцан туршлага солилцлоо. Мөн оролцогчдыг 2 бүлэгт хуваан “Хоршоо гишүүддээ хэрхэн зээл олгодог вэ” сэдвээр бүлгийн хэлэлцүүлэг зохион байгуулж орон орны туршлагаас харилцан суралцлаа.

Оролцогчид тухайн хотод үйл ажиллагаа явуулдаг, Бүх Хятадын Ханган нийлүүлэлт борлуулалтын хоршоодын холбооны гишүүн, хүнсний ногооны борлуулалтын чиглэлээр үйл ажиллагаа явуулдаг хоршооны үйл ажиллагаатай танилцлаа. Уг хоршоо нь 2007 онд байгуулагдсан, 448 гишүүнтэй бөгөөд гишүүдийнхээ тариалсан төрөл бүрийн хүнсний ногоог борлуулдаг, орон тооны болон цагийн ажилтан нийлсэн 60 гаруй ажилтантай юм. Тус хоршоо Япон, Канад улсад сармис экспортолдог байна.

Сургалтын төгсгөлд оролцогчдыг Өмнө зүгийн Торгоны замын гол хаалга болж байсан 1368-1397 онд баригдсан хуучин хотоор аялууллаа.